Color

कोरिया विशेष

मृगौला पीडित जुना गुरुङलाई तमु धीं ख्यङ्साङ्नाम्दो बुसान शाखा दक्षिण कोरियाद्धारा आर्थिक सहयोग

मृगौला पीडित जुना गुरुङलाई तमु धीं ख्यङ्साङ्नाम्दो बुसान शाखा दक्षिण कोरियाद्धारा आर्थिक सहयोग

बोम्जन गुरुङ, सउल कोरिया

११ सेप्टेम्बर २०२०

लमजुङ जिल्लाको राइनस नगरपालिका वडा नम्बर १ भंगारी निवासी दुवै मृगौलाको रोगले थलिएका उपचारार्थ जुना गुरुङलाई तमु धीं ख्यङ्साङ्नाम्दो बुसान शाखा दक्षिण कोरियाको नेतृत्वमा संकलित चौरहत्तर हजार रुपैंया आर्थिक सहयोग गरेको छ । कोरिया स्थित आफ्नो जातीय संस्कार, संस्कृति र परम्परा जगेर्ना गर्दै सक्रिय रुपमा समाजसेवाको पाटोमा शानदार उपस्थिति जनाउँदै आइरहेको यस जातीय संस्थाले बीस दिनको अवधी राखेर “जुना गुरुङ बचाउ अभियान” सञ्चालन गरेको थियो । सो अभियानबाट संकलित रकम आर्थिक राष्ट्रिय दैनिकको सहजीकरणसँगै समाजसेवी व्यक्तित्वहरु श्याम सुन्दर पाठक र बिजन गुरुङले बिरामीलाई छाउनी अस्पताल नजिकै रहेको उनकै कोठामा आर्थिक सहयोग हस्तान्तरण गरिएको हो ।

कोरोनाको कहर र नेपालमा जारी लकडाउनका कारण संकलित रकम बिरामीलाई समयमा उपलब्ध गराउन असमर्थ रहेको जानकारी तमु धीं ख्यङ्साङ्नाम्दो बुसान शाखाका सचिव समेत रहेका अभियन्ता गीतासिंह गुरुङले बताए । फेसबुकमा सानो ग्रुप निर्माण गरी यस अभियानको थालनी गरिएको र संकलित रकमले मृगौला पीडितको उपचारमा थोरै भएपनि राहत र सान्तवना मिल्नेमा सोही संस्थाका अध्यक्ष अनिस गुरुङले विश्वास व्यक्त गरे ।

“जुना गुरुङ बचाउ अभियान” मा जोडिएर ३१ जना सहयोगीहरुले स्वेच्छिक रुपमा आर्थिक सहयोग गरेका थिए । उक्त अभियानमा ७ लाख २३ हजार ५ सय कोरियन वोन अर्थात चौरहत्तर हजार रुपैंया संकलन भएको थियो । सहयोगीहरुको नामावली र रकमको विवरण संस्थाको पेजबाट अपडेट गरिएको छ । बिरामीको स्वास्थ लाभको कामना सहित अभियानमा जोडिनुहुने सबै सहयोगीहरुमा तमु धीं ख्यङ्साङ्नाम्दो बुसान शाखाले हार्दिक धन्यवाद व्यक्त गरेको छ ।

प्रतिक्रिया दिनुहोस